dil dil hi rahega gul-e-tar ho nahin sakta

dil dil hī rahegā gul-e-tar ho nahīñ saktā

ḳhuuñ ho ke bhī manzūr-e-nazar ho nahīñ saktā

jo zulm kiyā tū ne kiyā be-jigrī se

aisā to kisī kā bhī jigar ho nahīñ saktā

thak thak ke tirī raah meñ yuuñ baiTh gayā huuñ

goyā ki bas ab mujh se safar ho nahīñ saktā

iz.hār-e-mohabbat mire aañsū hī kareñge

iz.hār ba-andāz-e-digar ho nahīñ saktā

har buuñd lahū kī kabhī bantī nahīñ aañsū

jaise ki har ik qatra guhar ho nahīñ saktā

ye ahd-e-javānī bhī hai kuchh aisā zamāna

be-bāda-e-sarjosh basar ho nahīñ saktā

le jā.egā ye dil mujhe us bazm meñ āḳhir

jis meñ ki sabā kā bhī guzar ho nahīñ saktā

jab tak tirī rahmat kā hai 'kashfī' ko sahārā

sach ye hai gunāhoñ se hazar ho nahīñ saktā

dil dil hi rahega gul-e-tar ho nahin sakta

KHun ho ke bhi manzur-e-nazar ho nahin sakta

jo zulm kiya tu ne kiya be-jigri se

aisa to kisi ka bhi jigar ho nahin sakta

thak thak ke teri rah mein yun baiTh gaya hun

goya ki bas ab mujh se safar ho nahin sakta

izhaar-e-mohabbat mere aansu hi karenge

izhaar ba-andaz-e-digar ho nahin sakta

har bund lahu ki kabhi banti nahin aansu

jaise ki har ek qatra guhar ho nahin sakta

ye ahd-e-jawani bhi hai kuchh aisa zamana

be-baada-e-sarjosh basar ho nahin sakta

le jaega ye dil mujhe us bazm mein aaKHir

jis mein ki saba ka bhi guzar ho nahin sakta

jab tak teri rahmat ka hai 'kashfi' ko sahaara

sach ye hai gunahon se hazar ho nahin sakta