dil hi to hai nigah-e-karam se pighal gaya

dil hī to hai nigāh-e-karam se pighal gayā

shikva laboñ pe aa ke tabassum meñ Dhal gayā

pahuñchā na thā yaqīn kī manzil pe maiñ abhī

merā ḳhayāl mujh se bhī aage nikal gayā

ḳhalvat banī huī thī tirī anjuman magar

maiñ aa gayā to bazm kā naqsha badal gayā

vaañ mutma.in karam ki diyā hai ba-qadr-e-zarf

yaañ iztirāb-e-shauq meñ sāġhar badal gayā

hai chashm-e-iltifāt ko fikr-e-shikast-e-dil

shāyad harīf koī na.ī chaal chal gayā

pinhāñ thā laġhzishoñ meñ bhī ehsās-e-āgahī

maiñ kyā sambhal gayā ki zamāna sambhal gayā

ḳhīra hai bazm-e-yār meñ 'nayyar' nigāh-e-shauq

sham.eñ jalīñ ki dāman-e-nazzāra jal gayā

dil hi to hai nigah-e-karam se pighal gaya

shikwa labon pe aa ke tabassum mein Dhal gaya

pahuncha na tha yaqin ki manzil pe main abhi

mera KHayal mujh se bhi aage nikal gaya

KHalwat bani hui thi teri anjuman magar

main aa gaya to bazm ka naqsha badal gaya

wan mutmain karam ki diya hai ba-qadr-e-zarf

yan iztirab-e-shauq mein saghar badal gaya

hai chashm-e-iltifat ko fikr-e-shikast-e-dil

shayad harif koi nai chaal chal gaya

pinhan tha laghzishon mein bhi ehsas-e-agahi

main kya sambhal gaya ki zamana sambhal gaya

KHira hai bazm-e-yar mein 'nayyar' nigah-e-shauq

shamen jalin ki daman-e-nazzara jal gaya