dil ki taskin ko kafi hai pareshan hona

dil kī taskīn ko kaafī hai pareshāñ honā

hai tavakkul ba-ḳhudā be-sar-o-sāmāñ honā

yuuñ to har diin meñ hai sāhab-e-īmāñ honā

ham ko ik but ne sikhāyā hai musalmāñ honā

ai parī-rū tire dīvāne kā īmāñ kyā hai

ik nigāh-e-ġhalat-andāz pe qurbāñ honā

kor hai chashm jise da.avā-e-bīnā.ī hai

shart-e-avval hai jahāñ dīda-e-hairāñ honā

ham se rindadan-e-balā-nosh kā hai shurb-e-mudām

durd-āshām-e-mai-e-kulfat-e-hijrāñ honā

vaqf-e-taslīm-o-razā chāhiye dil āshiq kā

'sāhir' āsān nahīñ banda-e-jānāñ honā

dil ki taskin ko kafi hai pareshan hona

hai tawakkul ba-KHuda be-sar-o-saman hona

yun to har din mein hai sahab-e-iman hona

hum ko ek but ne sikhaya hai musalman hona

ai pari-ru tere diwane ka iman kya hai

ek nigah-e-ghalat-andaz pe qurban hona

kor hai chashm jise dawa-e-binai hai

shart-e-awwal hai jahan dida-e-hairan hona

hum se rindadan-e-bala-nosh ka hai shurb-e-mudam

durd-asham-e-mai-e-kulfat-e-hijran hona

waqf-e-taslim-o-raza chahiye dil aashiq ka

'sahir' aasan nahin banda-e-jaanan hona