dil mein ek qabr har ek hasrat-e-nakaam ke baad

dil meñ ik qabr har ik hasrat-e-nākām ke baad

aur ik shauq-e-kalām āḳhirī paiġhām ke baad

shaam Dhalte hī charāġhoñ ko bujhāyā maiñ ne

koī parvāna nahīñ marne diyā shaam ke baad

haa.e afsos sad-afsos mire hoñToñ par

ek bhī naam nahīñ Thahrā tire naam ke baad

zauq kuchh miT sā gayā us ke chale jaane se

koī bhāyā na mujhe us parī-andām ke baad

ik tajassus huā kartā hai bure kaam se qabl

ek pachhtāvā bure kaam ke anjām ke baad

koī bhī jurm na ho jurm-e-mohabbat ke sivā

koī ilzām na ho ishq ke ilzām ke baad

ab to fursat bhī mire vāste nāpaid hai dost

ik nayā kaam nikal aatā hai har kaam ke baad

dil mein ek qabr har ek hasrat-e-nakaam ke baad

aur ek shauq-e-kalam aaKHiri paigham ke baad

sham Dhalte hi charaghon ko bujhaya main ne

koi parwana nahin marne diya sham ke baad

hae afsos sad-afsos mere honTon par

ek bhi nam nahin Thahra tere nam ke baad

zauq kuchh miT sa gaya us ke chale jaane se

koi bhaya na mujhe us pari-andam ke baad

ek tajassus hua karta hai bure kaam se qabl

ek pachhtawa bure kaam ke anjam ke baad

koi bhi jurm na ho jurm-e-mohabbat ke siwa

koi ilzam na ho ishq ke ilzam ke baad

ab to fursat bhi mere waste napaid hai dost

ek naya kaam nikal aata hai har kaam ke baad