ghaTa zulfon ki jab se aur kali hoti jati hai

ghaTā zulfoñ kī jab se aur kaalī hotī jaatī hai

ruḳh-e-raushan kī tābānī misālī hotī jaatī hai

mire baḳht-e-siyah ke hāshiye par raushnī sī hai

mirī tārīk shab kuchh phir ujālī hotī jaatī hai

uThe jaate haiñ dīda-var sabhī āhista āhista

ye duniyā mo'tabar logoñ se ḳhālī hotī jaatī hai

vo merī anjuman par rañg barsāte haiñ kuchh aisā

ki har goshe kī ik ik shai nirālī hotī jaatī hai

vo jinsiyyat-zada māhaul meñ kyā aur pā.egā

jahāñ pākīzgī ik shai ḳhayālī hotī jaatī hai

'atīq' us dilrubā kī har adā bar-haq sahī lekin

tumhārī koshish-e-paiham bhī aalī hotī jaatī hai

ghaTa zulfon ki jab se aur kali hoti jati hai

ruKH-e-raushan ki tabani misali hoti jati hai

mere baKHt-e-siyah ke hashiye par raushni si hai

meri tarik shab kuchh phir ujali hoti jati hai

uThe jate hain dida-war sabhi aahista aahista

ye duniya mo'tabar logon se KHali hoti jati hai

wo meri anjuman par rang barsate hain kuchh aisa

ki har goshe ki ek ek shai nirali hoti jati hai

wo jinsiyyat-zada mahaul mein kya aur paega

jahan pakizgi ek shai KHayali hoti jati hai

'atiq' us dilruba ki har ada bar-haq sahi lekin

tumhaari koshish-e-paiham bhi aali hoti jati hai