ghonsle rakh ho gae jal ke

ghoñsle raakh ho ga.e jal ke

miT ga.e sab nishān jañgal ke

aag barsā ke uḌ gayā bādal

par nikal aa.e muue bādal ke

chīthḌe oḌh kar jo sotā huuñ

ḳhvāb aate haiñ mujh ko maḳhmal ke

saañp un se lipaT ga.e aksar

ham ne bo.e the peḌ sandal ke

jis meñ insāniyat nahīñ rahtī

ham darinde haiñ aise jañgal ke

jo havā par savār ho sāhab

kab vo chaltā hai saath paidal ke

aao bachchoñ kā ehtirām kareñ

ye to vāris haiñ sāhibo kal ke

apnā haq baḌh ke chhīn lo yaaro

yuuñ dikhāo na haath mal mal ke

kuchh batātā nahīñ tirā 'hasrat'

jaane ab dil meñ kyā hai pāgal ke

ghonsle rakh ho gae jal ke

miT gae sab nishan jangal ke

aag barsa ke uD gaya baadal

par nikal aae mue baadal ke

chithDe oDh kar jo sota hun

KHwab aate hain mujh ko maKHmal ke

sanp un se lipaT gae aksar

hum ne boe the peD sandal ke

jis mein insaniyat nahin rahti

hum darinde hain aise jangal ke

jo hawa par sawar ho sahab

kab wo chalta hai sath paidal ke

aao bachchon ka ehtiram karen

ye to waris hain sahibo kal ke

apna haq baDh ke chhin lo yaro

yun dikhao na hath mal mal ke

kuchh batata nahin tera 'hasrat'

jaane ab dil mein kya hai pagal ke