hai lahu shahidon ka naqsh-e-jawedan yaro

hai lahū shahīdoñ kā naqsh-e-jāvedāñ yaaro

maqtaloñ meñ hotī hai aaj bhī azaañ yaaro

sail-e-vaqt huuñ mujh ko kaun rok saktā hai

chhīn lo qalam chāhe kaaT lo zabāñ yaaro

bāl-o-par kī mahrūmī aur ḳhuuñ rulātī hai

jab bhī dekh letā huuñ sū-e-asmāñ yaaro

is nigāh-e-baham ko aur kis se duuñ nisbat

nok-e-be-sināñ yaaro tiir be-kamāñ yaaro

un kī bazm-e-rañgīñ kā ahal to na thā lekin

kaam aa ga.ī merī shoḳhī-e-bayāñ yaaro

ye bhī apne mehvar kī samt lauTtā hogā

be-sabab nahīñ uThtā aag se dhuāñ yaaro

is sadī ne baḳhshā hai mujh ko ek nayā lahja

mujh se chhuT nahīñ saktī jiddat-e-bayāñ yaaro

hai lahu shahidon ka naqsh-e-jawedan yaro

maqtalon mein hoti hai aaj bhi azan yaro

sail-e-waqt hun mujh ko kaun rok sakta hai

chhin lo qalam chahe kaT lo zaban yaro

baal-o-par ki mahrumi aur KHun rulati hai

jab bhi dekh leta hun su-e-asman yaro

is nigah-e-baham ko aur kis se dun nisbat

nok-e-be-sinan yaro tir be-kaman yaro

un ki bazm-e-rangin ka ahal to na tha lekin

kaam aa gai meri shoKHi-e-bayan yaro

ye bhi apne mehwar ki samt lauTta hoga

be-sabab nahin uThta aag se dhuan yaro

is sadi ne baKHsha hai mujh ko ek naya lahja

mujh se chhuT nahin sakti jiddat-e-bayan yaro