ہے یک دو نفس سیر جہان گزراں اور

ہے یک دو نفس سیر جہان گزراں اور

اے شوق کوئی رنگ نشاط دل و جاں اور

آسودگی آموز ہو جب آبلہ پائی

ہو جاتی ہے منزل کی لگن دل میں تپاں اور

سنگ نگہ شوق ہے یکسانیٔ تغییر

ہر لحظہ نئی رت ہو بہار اور خزاں اور

بیش از نگہ کم نہیں پنہائے شب و روز

اے عالم امکاں کوئی نادیدہ جہاں اور

یہ ارض و سما ننگ ہیں مانند کف دست

اک دشت بہ اندازۂ چشم نگراں اور

توفیق فقط مجھ کو ہوا جادۂ احساس

یا قافلے اس تیرہ خلا میں ہیں رواں اور

آگاہئ مطلق جو نہیں ہے مرا مقدور

اک مہلت فریاد سر کون و مکاں اور

دل وصل کی لذت کا طلب گار ہے لیکن

تکمیل تمنا غم فرقت ہے تو ہاں اور