hai yak do nafas sair-e-jahan-e-guzran aur

hai yak do nafas sair-e-jahān-e-guzrāñ aur

ai shauq koī rañg-e-nashāt-e-dil-o-jāñ aur

āsūdgī-āmoz ho jab ābla-pā.ī

ho jaatī hai manzil kī lagan dil meñ tapāñ aur

sañg-e-nigah-e-shauq hai yaksānī-e-taġh.īr

har lahza na.ī rut ho bahār aur ḳhizāñ aur

besh-az-nigah-e-kam nahīñ pihnā-e-shab-o-roz

ai ālam-e-imkāñ koī nādīda-jahāñ aur

ye arz o samā nañg haiñ mānind-e-kaf-e-dast

ik dasht ba-andāza-e-chashm-e-nigrāñ aur

taufīq faqat mujh ko huā jāda-e-ehsās

yā qāfile is tiira ḳhalā meñ haiñ ravāñ aur

āgāhi-e-mutlaq jo nahīñ hai mirā maqdūr

ik mohlat-e-fariyād sar-e-kaun-o-makāñ aur

dil vasl kī lazzat kā talabgār hai lekin

takmīl-e-tamannā ġham-e-furqat hai to haañ aur

hai yak do nafas sair-e-jahan-e-guzran aur

ai shauq koi rang-e-nashat-e-dil-o-jaan aur

aasudgi-amoz ho jab aabla-pai

ho jati hai manzil ki lagan dil mein tapan aur

sang-e-nigah-e-shauq hai yaksani-e-taghir

har lahza nai rut ho bahaar aur KHizan aur

besh-az-nigah-e-kam nahin pihna-e-shab-o-roz

ai aalam-e-imkan koi nadida-jahan aur

ye arz o sama nang hain manind-e-kaf-e-dast

ek dasht ba-andaza-e-chashm-e-nigran aur

taufiq faqat mujh ko hua jada-e-ehsas

ya qafile is tera KHala mein hain rawan aur

aagahi-e-mutlaq jo nahin hai mera maqdur

ek mohlat-e-fariyaad sar-e-kaun-o-makan aur

dil wasl ki lazzat ka talabgar hai lekin

takmil-e-tamanna gham-e-furqat hai to han aur