hum bin gham-e-yar bhi jiye hain

ham bin ġham-e-yār bhī jiye haiñ

marne ke baḌe jatan kiye haiñ

maḳhfī tujh se bhī haiñ ġham-e-yār

kuchh vaar jo dil ne sah liye haiñ

dil se bhī chhupā ke ham ne rakkhe

kuchh chaak jo umr bhar siye haiñ

kuchh ḳhūn-e-vafā se kuchh hinā se

kyā rañg bahār ne liye haiñ

afsos hamārī saḳht-jānī

ahbāb ne bhī gile kiye haiñ

gulshan meñ ajab havā chalī hai

phūloñ ne hoñT sī liye haiñ

dil-bāḳhtagī o sher-ḳhvānī

do kaam to umr bhar kiye haiñ

kahte the tujhī ko jaan apnī

aur tere baġhair bhī jiye haiñ

hum bin gham-e-yar bhi jiye hain

marne ke baDe jatan kiye hain

maKHfi tujh se bhi hain gham-e-yar

kuchh war jo dil ne sah liye hain

dil se bhi chhupa ke hum ne rakkhe

kuchh chaak jo umr bhar siye hain

kuchh KHun-e-wafa se kuchh hina se

kya rang bahaar ne liye hain

afsos hamari saKHt-jaani

ahbab ne bhi gile kiye hain

gulshan mein ajab hawa chali hai

phulon ne honT si liye hain

dil-baKHtagi o sher-KHwani

do kaam to umr bhar kiye hain

kahte the tujhi ko jaan apni

aur tere baghair bhi jiye hain