ham ne āvāz na dī barg o navā hote hue
aur milne na ga.e us kā patā hote hue
aañkh ke ek ishāre se kiyā gul us ne
jal rahā thā jo diyā itnī havā hote hue
ek pattā sā laraztā huuñ sar-e-shāḳh-e-gumāñ
apne har-sū koī tūfān-e-balā hote hue
chal rahe hote haiñ dhāre ka.ī dariyā meñ so ham
sab meñ shāmil bhī rahe sab se judā hote hue
vaqt par aa ke baras to ga.e bādal lekin
der hī lag ga.ī jañgal ko harā hote hue
ham bhalā dād-e-suḳhan kyuuñ nahīñ chāheñge ki vo
aap tārīf kā tālib hai ḳhudā hote hue
kuchh hameñ bhī ḳhabar is kī na huī ḳhaas ki ham
kyā se kyā hote ga.e asl meñ kyā hote hue
baat kā aur bhī ho saktā hai matlab aur phir
lafz tabdīl bhī hotā hai adā hote hue
kyā zamāna hai ki is gumbad-e-be-dar meñ 'zafar'
apnī āvāz ko dekhā hai fanā hote hue
hum ne aawaz na di barg o nawa hote hue
aur milne na gae us ka pata hote hue
aankh ke ek ishaare se kiya gul us ne
jal raha tha jo diya itni hawa hote hue
ek patta sa larazta hun sar-e-shaKH-e-guman
apne har-su koi tufan-e-bala hote hue
chal rahe hote hain dhaare kai dariya mein so hum
sab mein shamil bhi rahe sab se juda hote hue
waqt par aa ke baras to gae baadal lekin
der hi lag gai jangal ko hara hote hue
hum bhala dad-e-suKHan kyun nahin chahenge ki wo
aap tarif ka talib hai KHuda hote hue
kuchh hamein bhi KHabar is ki na hui KHas ki hum
kya se kya hote gae asl mein kya hote hue
baat ka aur bhi ho sakta hai matlab aur phir
lafz tabdil bhi hota hai ada hote hue
kya zamana hai ki is gumbad-e-be-dar mein 'zafar'
apni aawaz ko dekha hai fana hote hue
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.