har zaKHm-e-dil se anjuman-arai mang lo

har zaḳhm-e-dil se anjuman-ārā.ī maañg lo

phir shahr-e-pur-hujūm se tanhā.ī maañg lo

mausam kā zulm sahte haiñ kis ḳhāmushī ke saath

tum pattharoñ se tarz-e-shakebā.ī maañg lo

husn-e-ta.alluqāt kī jo yādgār the

maazī se aise lamhoñ kī ra.anā.ī maañg lo

māñgo samundaroñ se na sāhil kī bhiik tum

haañ fikr-o-fan ke vāste gahrā.ī maañg lo

samjho unheñ jo dete haiñ ye mashvara tumheñ

nargis se haath joḌ ke bīnā.ī maañg lo

vo so ke jyuuñ hī uTTheñ pahuñch jaao un ke paas

aur un se inqalāb kī añgḌā.ī maañg lo

'najmī' sunā hai tum pe bhī mausam hai mehrbāñ

bād-e-sumūm se kabhī purvā.ī maañg lo

har zaKHm-e-dil se anjuman-arai mang lo

phir shahr-e-pur-hujum se tanhai mang lo

mausam ka zulm sahte hain kis KHamushi ke sath

tum pattharon se tarz-e-shakebai mang lo

husn-e-talluqat ki jo yaadgar the

mazi se aise lamhon ki ranai mang lo

mango samundaron se na sahil ki bhik tum

han fikr-o-fan ke waste gahrai mang lo

samjho unhen jo dete hain ye mashwara tumhein

nargis se hath joD ke binai mang lo

wo so ke jyun hi uTThen pahunch jao un ke pas

aur un se inqalab ki angDai mang lo

'najmi' suna hai tum pe bhi mausam hai mehrban

baad-e-sumum se kabhi purwai mang lo