hisab-e-umr karo ya hisab-e-jam karo

hisāb-e-umr karo yā hisāb-e-jām karo

ba-qadr-e-zarf shab-e-ġham kā ehtimām karo

agar zarā bhī rivāyat kī pāsdārī hai

ḳhirad ke daur meñ rasm-e-junūñ ko aam karo

ḳhudā gavāh faqīroñ kā tajraba ye hai

jahāñ ho sub.h tumhārī vahāñ na shaam karo

na riñd o shaiḳh na mullā na mohtasib na faqīh

ye mai-kada hai yahāñ sab ko shād-kām karo

vahī hai tesha bayābāñ vahī hai daar vahī

jo ho sake to zamāne meñ tum bhī naam karo

ḳhirām-e-yār kī aahaT sī dil se aatī hai

sarishk-e-ḳhūñ se charāġhāñ kā ehtimām karo

asīr-e-zulf hamīñ ik nahīñ haiñ 'mīr' bhī the

magar ab uTh ke do-ālam ko zer-e-dām karo

'arrīb' dekho na itrāo chand sheroñ par

ġhazal vo fan hai ki 'ġhālib' ko tum salām karo

hisab-e-umr karo ya hisab-e-jam karo

ba-qadr-e-zarf shab-e-gham ka ehtimam karo

agar zara bhi riwayat ki pasdari hai

KHirad ke daur mein rasm-e-junun ko aam karo

KHuda gawah faqiron ka tajraba ye hai

jahan ho subh tumhaari wahan na sham karo

na rind o shaiKH na mulla na mohtasib na faqih

ye mai-kada hai yahan sab ko shad-kaam karo

wahi hai tesha bayaban wahi hai dar wahi

jo ho sake to zamane mein tum bhi nam karo

KHiram-e-yar ki aahaT si dil se aati hai

sarishk-e-KHun se charaghan ka ehtimam karo

asir-e-zulf hamin ek nahin hain 'mir' bhi the

magar ab uTh ke do-alam ko zer-e-dam karo

'arrib' dekho na itrao chand sheron par

ghazal wo fan hai ki 'ghaalib' ko tum salam karo