hujum-e-dard ka itna baDhe asar gum ho

hujūm-e-dard kā itnā baḌhe asar gum ho

mile vo raat ki jis raat kī sahar gum ho

mazā to jab hai ki āvārgān-e-shauq ke saath

ġhubār ban ke chale aur rahguzar gum ho

hamārī tarah ḳharāb-e-safar na ho koī

ilāhī yuuñ to kisī kā na rāhbar gum ho

chale haiñ ham bhī charāġh-e-nazar jalā.e hue

ye raushnī bhī kahīñ raah meñ agar gum ho

talāsh-e-dost hai dil ko magar ḳhudā jaane

kahāñ kahāñ ye bhaTaktā phire kidhar gum ho

chaman chaman haiñ vo nashv-o-numā ke hañgāme

guloñ ko DhūñDne jaa.e to ḳhud nazar gum ho

suḳhan kī jaan hai husn-e-bayāñ magar 'tābāñ'

na yuuñ ki lafz hī rah jaa.eñ fikr-e-tar gum ho

hujum-e-dard ka itna baDhe asar gum ho

mile wo raat ki jis raat ki sahar gum ho

maza to jab hai ki aawargan-e-shauq ke sath

ghubar ban ke chale aur rahguzar gum ho

hamari tarah KHarab-e-safar na ho koi

ilahi yun to kisi ka na rahbar gum ho

chale hain hum bhi charagh-e-nazar jalae hue

ye raushni bhi kahin rah mein agar gum ho

talash-e-dost hai dil ko magar KHuda jaane

kahan kahan ye bhaTakta phire kidhar gum ho

chaman chaman hain wo nashw-o-numa ke hangame

gulon ko DhunDne jae to KHud nazar gum ho

suKHan ki jaan hai husn-e-bayan magar 'taban'

na yun ki lafz hi rah jaen fikr-e-tar gum ho