huzur-e-yar bhi aansu nikal hi aate hain

huzūr-e-yār bhī aañsū nikal hī aate haiñ

kuchh iḳhtilāf ke pahlū nikal hī aate haiñ

mizāj ek nazar ek dil bhī ek sahī

muāmalāt-e-man-o-tū nikal hī aate haiñ

hazār ham-suḳhnī ho hazār ham-nazarī

maqām-e-jumbish-e-abrū nikal hī aate haiñ

hinā-e-nāḳhun-e-pā ho ki halqa-e-sar-e-zulf

chhupāo bhī to ye jaadū nikal hī aate haiñ

janāb-e-shaiḳh vazū ke liye sahī lekin

kisī bahāne lab-e-jū nikal hī aate haiñ

matā-e-ishq vo aañsū jo dil meñ Duub ga.e

zamīñ kā rizq jo aañsū nikal hī aate haiñ

huzur-e-yar bhi aansu nikal hi aate hain

kuchh iKHtilaf ke pahlu nikal hi aate hain

mizaj ek nazar ek dil bhi ek sahi

muamalat-e-man-o-tu nikal hi aate hain

hazar ham-suKHni ho hazar ham-nazari

maqam-e-jumbish-e-abru nikal hi aate hain

hina-e-naKHun-e-pa ho ki halqa-e-sar-e-zulf

chhupao bhi to ye jadu nikal hi aate hain

janab-e-shaiKH wazu ke liye sahi lekin

kisi bahane lab-e-ju nikal hi aate hain

mata-e-ishq wo aansu jo dil mein Dub gae

zamin ka rizq jo aansu nikal hi aate hain