ibtida hun ki intiha hun main

ibtidā huuñ ki intihā huuñ maiñ

umr bhar sochtā rahā huuñ maiñ

lafz-o-ma.anī se māvarā huuñ maiñ

ek ḳhāmosh iltijā huuñ maiñ

dil meñ koī ḳhushī nahīñ lekin

ādatan muskurā rahā huuñ maiñ

nā-tavāñ ho ke adl chāhtā huuñ

vāqa.ī qābil-e-sazā huuñ maiñ

dekh kar rañg bazm-e-ālam kā

naqsh-e-dīvār ban gayā huuñ maiñ

subah ke intizār meñ 'rif.at'

raat bhar sochtā rahā huuñ maiñ

ibtida hun ki intiha hun main

umr bhar sochta raha hun main

lafz-o-mani se mawara hun main

ek KHamosh iltija hun main

dil mein koi KHushi nahin lekin

aadatan muskura raha hun main

na-tawan ho ke adl chahta hun

waqai qabil-e-saza hun main

dekh kar rang bazm-e-alam ka

naqsh-e-diwar ban gaya hun main

subah ke intizar mein 'rifat'

raat bhar sochta raha hun main