idhar ye zaban kuchh batati nahin hai

idhar ye zabāñ kuchh batātī nahīñ hai

udhar aañkh kuchh bhī chhupātī nahīñ hai

pata hai rihā.ī kī dushvāriyāñ par

ye qaid-e-qafas bhī to bhātī nahīñ hai

kamī rah ga.ī hogī kuchh to kashish meñ

sadā lauT kar yuuñ hī aatī nahīñ hai

mujhe raas vīrāniyāñ aa ga.ī haiñ

tirī yaad bhī ab satātī nahīñ hai

ḳhafā hai karam-farmā hai kaun jaane

havā jab diye ko bujhātī nahīñ hai

agar ho ga.e soch meñ aap būḌhe

to bārish badan ko jalātī nahīñ hai

gumāñ pyaar kā ho rahā tab se 'nīraj'

qasam jab se merī vo khātī nahīñ hai

idhar ye zaban kuchh batati nahin hai

udhar aankh kuchh bhi chhupati nahin hai

pata hai rihai ki dushwariyan par

ye qaid-e-qafas bhi to bhati nahin hai

kami rah gai hogi kuchh to kashish mein

sada lauT kar yun hi aati nahin hai

mujhe ras viraniyan aa gai hain

teri yaad bhi ab satati nahin hai

KHafa hai karam-farma hai kaun jaane

hawa jab diye ko bujhati nahin hai

agar ho gae soch mein aap buDhe

to barish badan ko jalati nahin hai

guman pyar ka ho raha tab se 'niraj'

qasam jab se meri wo khati nahin hai