ek pal mein kya kuchh badal gaya jab be-KHabron ko KHabar hui

ik pal meñ kyā kuchh badal gayā jab be-ḳhabroñ ko ḳhabar huī

maiñ tanhā.ī meñ chhupā rahā jab mujh par us kī nazar huī

ik chāñd chamak kar chalā gayā phir kitnī ghaḌiyāñ guzar ga.iiñ

mujh ko to kuchh bhī ḳhabar na thī kab raat huī kab sahar huī

thī husn kī chhab ik ajab adā jab phuul sā chehra mahak uThā

vo manzar mujh ko jachā bahut phir umr usī meñ basar huī

aanā bhī terā ġhazab huā is shahr kā manzar badal gayā

bhauñchāl sā aayā galī galī har chiiz idhar se udhar huī

ye rog lagā hai ajab hameñ jo jaan bhī le kar Talā nahīñ

har ek davā be-asar ga.ī har ek duā be-asar huī

ek pal mein kya kuchh badal gaya jab be-KHabron ko KHabar hui

main tanhai mein chhupa raha jab mujh par us ki nazar hui

ek chand chamak kar chala gaya phir kitni ghaDiyan guzar gain

mujh ko to kuchh bhi KHabar na thi kab raat hui kab sahar hui

thi husn ki chhab ek ajab ada jab phul sa chehra mahak uTha

wo manzar mujh ko jacha bahut phir umr usi mein basar hui

aana bhi tera ghazab hua is shahr ka manzar badal gaya

bhaunchaal sa aaya gali gali har chiz idhar se udhar hui

ye rog laga hai ajab hamein jo jaan bhi le kar Tala nahin

har ek dawa be-asar gai har ek dua be-asar hui