is tarah sataya hai pareshan kiya hai

is tarah satāyā hai pareshān kiyā hai

goyā ki mohabbat nahīñ ehsān kiyā hai

tujh ko hī nahīñ mujh ko bhī hairān kiyā hai

is dil ne baḌā ham ko pareshān kiyā hai

sochā thā ki tum dūsroñ jaise nahīñ hoge

tum ne bhī vahī kaam mirī jaan kiyā hai

har roz sajāte haiñ tirī yaad ke ġhunche

āñkhoñ ko tire hijr meñ gul-dān kiyā hai

mushkil thā bahut mere liye tark-e-ta.alluq

ye kaam bhī tum ne mirā āsān kiyā hai

ye dil kā nagar aise to vīrān thā kab se

lā-raib ise aap ne sunsān kiyā hai

ye izzat-o-nāmūs sabhī us kī atā hai

vo jis ne gaḌariye ko bhī sultān kiyā hai

is tarah sataya hai pareshan kiya hai

goya ki mohabbat nahin ehsan kiya hai

tujh ko hi nahin mujh ko bhi hairan kiya hai

is dil ne baDa hum ko pareshan kiya hai

socha tha ki tum dusron jaise nahin hoge

tum ne bhi wahi kaam meri jaan kiya hai

har roz sajate hain teri yaad ke ghunche

aankhon ko tere hijr mein gul-dan kiya hai

mushkil tha bahut mere liye tark-e-talluq

ye kaam bhi tum ne mera aasan kiya hai

ye dil ka nagar aise to viran tha kab se

la-raib ise aap ne sunsan kiya hai

ye izzat-o-namus sabhi us ki ata hai

wo jis ne gaDariye ko bhi sultan kiya hai