ji mein aata hai ki chal kar jangalon mein ja rahen

jī meñ aatā hai ki chal kar jañgaloñ meñ jā raheñ

nit-na.e mausam ke bhī hamrāh vābasta raheñ

aatī jaatī rut ko dekheñ apne chashm o gosh se

mausamoñ ke vaar sah kar bhī yūñhī zinda raheñ

phuul phal paude parinde hamdam o dam-sāz hoñ

in meñ baste hī bhale lekin na yuuñ tanhā raheñ

shahr ke dīvār-o-dar har ik se haiñ nā-āshnā

shahr meñ rahte hue kyūñkar na begāna raheñ

be-muravvat hai zamāna us kā shikva kyuuñ kareñ

apne andar ke makīñ kā ban ke ham-sāya raheñ

jism ke andar ġhamoñ kī āñdhiyāñ chaltī raheñ

zāhirī sūrat meñ sab chehre tar-o-tāza raheñ

dekhte hī jis ko sab mahrūmiyāñ kāfūr hoñ

dil meñ tūfāñ se uTheñ chehre magar saada raheñ

mas.ala ye bhī to hai is ahd kā ai jān-e-jāñ

kyuuñ nichhāvar jaañ kareñ kis ke liye zinda raheñ

uḌte lamhoñ ko agar qaabū meñ karnā hai 'sa.īd'

bhāgne ko har ghaḌī har vaqt āmāda raheñ

ji mein aata hai ki chal kar jangalon mein ja rahen

nit-nae mausam ke bhi hamrah wabasta rahen

aati jati rut ko dekhen apne chashm o gosh se

mausamon ke war sah kar bhi yunhi zinda rahen

phul phal paude parinde hamdam o dam-saz hon

in mein baste hi bhale lekin na yun tanha rahen

shahr ke diwar-o-dar har ek se hain na-ashna

shahr mein rahte hue kyunkar na begana rahen

be-murawwat hai zamana us ka shikwa kyun karen

apne andar ke makin ka ban ke ham-saya rahen

jism ke andar ghamon ki aandhiyan chalti rahen

zahiri surat mein sab chehre tar-o-taza rahen

dekhte hi jis ko sab mahrumiyan kafur hon

dil mein tufan se uThen chehre magar sada rahen

masala ye bhi to hai is ahd ka ai jaan-e-jaan

kyun nichhawar jaan karen kis ke liye zinda rahen

uDte lamhon ko agar qabu mein karna hai 'said'

bhagne ko har ghaDi har waqt aamada rahen