jise samjha hai tu ai sang-dil mai-KHwariyan meri

jise samjhā hai tū ai sang-dil mai-ḳhvāriyāñ merī

tire ḳhalvat-kade meñ haiñ vo shab-bedāriyāñ merī

sadā ādāb kī had meñ rahā dast-e-junūñ merā

mirī vahshat meñ bhī qaa.em rahīñ ḳhuddāriyāñ merī

ḳhudā kā shukr hai uThtā nahīñ dast-e-talab merā

ḳhushā-qismat banīñ kamzoriyāñ ḳhuddāriyāñ merī

pas-e-murdan bhī musht-e-ḳhāk meñ kaisī ye vahshat hai

uThā kartī hai āñdhī ban ke ḳhāk-e-rā.egāñ merī

mirī ma.asūm fitrat hī ne jab sab kuchh diyā mujh ko

mire kis kaam ā.eñgī ye phir hushyāriyāñ merī

abhī merī zarūrat hai maiñ kyoñ mar jā.ūñ ai nāseh

mujhe sāġhar-ba-kaf rakhtī haiñ zimmedāriyāñ merī

agar dekhā na hotā 'soz' maiñ ne ḳhvāb-e-mai-ḳhāna

kabhī kā ḳhatm kar detīñ mujhe bedāriyāñ merī

jise samjha hai tu ai sang-dil mai-KHwariyan meri

tere KHalwat-kade mein hain wo shab-bedariyan meri

sada aadab ki had mein raha dast-e-junun mera

meri wahshat mein bhi qaem rahin KHuddariyan meri

KHuda ka shukr hai uThta nahin dast-e-talab mera

KHusha-qismat banin kamzoriyan KHuddariyan meri

pas-e-murdan bhi musht-e-KHak mein kaisi ye wahshat hai

uTha karti hai aandhi ban ke KHak-e-raegan meri

meri masum fitrat hi ne jab sab kuchh diya mujh ko

mere kis kaam aaengi ye phir hushyariyan meri

abhi meri zarurat hai main kyon mar jaun ai naseh

mujhe saghar-ba-kaf rakhti hain zimmedariyan meri

agar dekha na hota 'soz' main ne KHwab-e-mai-KHana

kabhi ka KHatm kar detin mujhe bedariyan meri