jo aaine se teri jalwa-samani nahin jati

jo ā.īne se terī jalva-sāmānī nahīñ jaatī

kisī bhī dekhne vaale kī hairānī nahīñ jaatī

kabhī ik baar haule se pukārā thā mujhe tum ne

kisī kī mujh se ab āvāz pahchānī nahīñ jaatī

bharī mahfil meñ mujh se pher lī thiiñ be-sabab nazreñ

vo din aur aaj tak un kī pashemānī nahīñ jaatī

pise jaate haiñ dil har-gām pe shor-e-qayāmat se

ḳhirām-e-nāz terī fitna-sāmānī nahīñ jaatī

gavārā hī na thī jin ko judā.ī merī dam-bhar kī

unhīñ se aaj merī shakl pahchānī nahīñ jaatī

vo mere haath kā shoḳhī se jaanā un ke dāman tak

vo un kā naaz se kahnā ki nādānī nahīñ jaatī

garebāñ ahl-e-vahshat ke siyā kartā thā hosh ik din

aur ab mujh se hī merī chāk-dāmānī nahīñ jaatī

jo aaine se teri jalwa-samani nahin jati

kisi bhi dekhne wale ki hairani nahin jati

kabhi ek bar haule se pukara tha mujhe tum ne

kisi ki mujh se ab aawaz pahchani nahin jati

bhari mahfil mein mujh se pher li thin be-sabab nazren

wo din aur aaj tak un ki pashemani nahin jati

pise jate hain dil har-gam pe shor-e-qayamat se

KHiram-e-naz teri fitna-samani nahin jati

gawara hi na thi jin ko judai meri dam-bhar ki

unhin se aaj meri shakl pahchani nahin jati

wo mere hath ka shoKHi se jaana un ke daman tak

wo un ka naz se kahna ki nadani nahin jati

gareban ahl-e-wahshat ke siya karta tha hosh ek din

aur ab mujh se hi meri chaak-damani nahin jati