kabhi jo aankhon mein pal-bhar ko KHwab jagte hain

kabhī jo āñkhoñ meñ pal-bhar ko ḳhvāb jāgte haiñ

to phir mahīnoñ musalsal azaab jāgte haiñ

kisī ke lams kī tāsīr hai ki barsoñ ba.ad

mirī kitāboñ meñ ab bhī gulāb jāgte haiñ

burā.ī kuchh to yaqīnan hai be-hijābī meñ

magar vo fitne jo zer-e-naqāb jāgte haiñ

sitam-shi.āroñ hamārā tum imtihān na lo

hamāre sabr se sad inqalāb jāgte haiñ

hameñ ḳhud apnī samā.at pe sharam aatī hai

ki mimbaroñ se ab aise ḳhitāb jāgte haiñ

ye niiñd letī hai 'aḳhlāq' vo ḳhirāj ki bas

jo ḳhuub sote haiñ ho kar ḳharāb jāgte haiñ

kabhi jo aankhon mein pal-bhar ko KHwab jagte hain

to phir mahinon musalsal azab jagte hain

kisi ke lams ki tasir hai ki barson baad

meri kitabon mein ab bhi gulab jagte hain

burai kuchh to yaqinan hai be-hijabi mein

magar wo fitne jo zer-e-naqab jagte hain

sitam-shiaron hamara tum imtihan na lo

hamare sabr se sad inqalab jagte hain

hamein KHud apni samaat pe sharam aati hai

ki mimbaron se ab aise KHitab jagte hain

ye nind leti hai 'aKHlaq' wo KHiraj ki bas

jo KHub sote hain ho kar KHarab jagte hain