kahan nasib zamurrad ko surKH-rui ye

kahāñ nasīb zamurrad ko surḳh-rūī ye

samajh meñ laal kī ab tak hinā nahīñ aa.ī

ḳhajil hai āñkhoñ se nargis gulāb gāloñ se

vo kaun phuul hai jis ko hayā nahīñ aa.ī

umaD rahā hai paḌā dil meñ shauq zulfoñ kā

ye jhuum jhuum ke kaalī ghaTā nahīñ aa.ī

ho jis se aage vo but ham se ham-suḳhan vaa.iz

kahīñ hadīs meñ aisī duā nahīñ aa.ī

zabāñ pe us kī hai har dam mirī balā aa.e

balā bhī aa.e to samjho balā nahīñ aa.ī

shab-e-firāq kā chhāyā huā hai rob aisā

bulā bulā ke thake ham qazā nahīñ aa.ī

nazar hai yaar kī 'shahbāz' kīmiyā-tāsīr

par apne hisse meñ ye kīmiyā nahīñ aa.ī

kahan nasib zamurrad ko surKH-rui ye

samajh mein lal ki ab tak hina nahin aai

KHajil hai aankhon se nargis gulab galon se

wo kaun phul hai jis ko haya nahin aai

umaD raha hai paDa dil mein shauq zulfon ka

ye jhum jhum ke kali ghaTa nahin aai

ho jis se aage wo but hum se ham-suKHan waiz

kahin hadis mein aisi dua nahin aai

zaban pe us ki hai har dam meri bala aae

bala bhi aae to samjho bala nahin aai

shab-e-firaq ka chhaya hua hai rob aisa

bula bula ke thake hum qaza nahin aai

nazar hai yar ki 'shahbaz' kimiya-tasir

par apne hisse mein ye kimiya nahin aai