kaho kya mehrban na-mehrban taqdir hoti hai

kaho kyā mehrbāñ nā-mehrbāñ taqdīr hotī hai

kahā maañ kī duāoñ meñ baḌī tāsīr hotī hai

kaho kyā baat kartī hai kabhī sahrā kī ḳhāmoshī

kahā us ḳhāmushī meñ bhī to ik taqrīr hotī hai

kahā maiñ ne ki ranj-e-be-makānī kab satātā hai

kahā jab maqbare yā qasr kī ta.amīr hotī hai

kahā maiñ ne hisār-e-zāt meñ ye nafs kī duniyā

javāb aayā ki sab kuchh haar kar tasḳhīr hotī hai

kahā ye ḳhvāhish-o-tarġhīb aur ye ḳhuun ke rishte

kahā zindāniyoñ ke paañv meñ zanjīr hotī hai

kahā vo jo savālī aañkh kī putlī pe likkhī thī

kahā sab se mo.assir to vahī tahrīr hotī hai

kahā ahl-e-ḳhirad 'anjum' tumheñ be-kār kahte haiñ

kahā sikke kī apne des meñ tauqīr hotī hai

kaho kya mehrban na-mehrban taqdir hoti hai

kaha man ki duaon mein baDi tasir hoti hai

kaho kya baat karti hai kabhi sahra ki KHamoshi

kaha us KHamushi mein bhi to ek taqrir hoti hai

kaha main ne ki ranj-e-be-makani kab satata hai

kaha jab maqbare ya qasr ki tamir hoti hai

kaha main ne hisar-e-zat mein ye nafs ki duniya

jawab aaya ki sab kuchh haar kar tasKHir hoti hai

kaha ye KHwahish-o-targhib aur ye KHun ke rishte

kaha zindaniyon ke panw mein zanjir hoti hai

kaha wo jo sawali aankh ki putli pe likkhi thi

kaha sab se moassir to wahi tahrir hoti hai

kaha ahl-e-KHirad 'anjum' tumhein be-kar kahte hain

kaha sikke ki apne des mein tauqir hoti hai