kar apni baat ki pyare kisi ki baat se kya

kar apnī baat ki pyāre kisī kī baat se kyā

liyā hai kaam batā tū ne is hayāt se kyā

yahāñ to jo bhī hai raahī hai band galiyoñ kā

nikal ke dekhā hai kis ne hisār-e-zāt se kyā

thī band band bahut guftugū-e-yār magar

khule haiñ uqda-e-dil us kī baat baat se kyā

vo chup lagī hai ki hañstā hai aur na rotā hai

ye ho gayā hai ḳhudā jaane dil ko raat se kyā

ye rāz-e-dair-o-haram hai kisī ko kyā ma.alūm

kahāniyoñ ko ilāqa hai vāqi.āt se kyā

shikast kā to kisī ko jahāñ gumāñ bhī na thā

nikal ga.e haiñ vo maidāñ hamāre haat se kyā

haiñ roz-e-abr ke mushtāq-e-dīd to lākhoñ

liyā hai kis ne magar abr ke sifāt se kyā

har ik to apnī ġharaz le ke ham se miltā hai

uThā.eñ fā.eda kis ke ta.alluqāt se kyā

koī to maqsad-e-sher-o-adab bhī hogā 'umar'

na hoñ jo kaam kī aisī nigārshāt se kyā

kar apni baat ki pyare kisi ki baat se kya

liya hai kaam bata tu ne is hayat se kya

yahan to jo bhi hai rahi hai band galiyon ka

nikal ke dekha hai kis ne hisar-e-zat se kya

thi band band bahut guftugu-e-yar magar

khule hain uqda-e-dil us ki baat baat se kya

wo chup lagi hai ki hansta hai aur na rota hai

ye ho gaya hai KHuda jaane dil ko raat se kya

ye raaz-e-dair-o-haram hai kisi ko kya malum

kahaniyon ko ilaqa hai waqiat se kya

shikast ka to kisi ko jahan guman bhi na tha

nikal gae hain wo maidan hamare hat se kya

hain roz-e-abr ke mushtaq-e-did to lakhon

liya hai kis ne magar abr ke sifat se kya

har ek to apni gharaz le ke hum se milta hai

uThaen faeda kis ke talluqat se kya

koi to maqsad-e-sher-o-adab bhi hoga 'umar'

na hon jo kaam ki aisi nigarshat se kya