KHayal-o-KHwab mein diwar-o-dar bhi sath rakkho

ḳhayāl-o-ḳhvāb meñ dīvār-o-dar bhī saath rakkho

musāfirat meñ raho aur ghar bhī saath rakho

ajab nahīñ ki shahādat talab kare manzil

karo paḌāv to gard-e-safar bhī saath rakho

zar-o-guhar se bhī bantī haiñ qāmateñ lekin

koī salīqa-e-arz-e-hunar bhī saath rakho

ham aise log pas-e-guftugū bhī jānte haiñ

hameñ milo to ḳhulūs-e-nazar bhī saath rakho

kuchh is liye bhī vo sailāb bhej detā hai

ki bastiyoñ meñ raho aur khañDar bhī saath rakho

kaḌī hai dhuup to ḳhvāboñ meñ hī sahī 'razmī'

harī rutoñ ke ghanere shajar bhī saath rakho

KHayal-o-KHwab mein diwar-o-dar bhi sath rakkho

musafirat mein raho aur ghar bhi sath rakho

ajab nahin ki shahadat talab kare manzil

karo paDaw to gard-e-safar bhi sath rakho

zar-o-guhar se bhi banti hain qamaten lekin

koi saliqa-e-arz-e-hunar bhi sath rakho

hum aise log pas-e-guftugu bhi jaante hain

hamein milo to KHulus-e-nazar bhi sath rakho

kuchh is liye bhi wo sailab bhej deta hai

ki bastiyon mein raho aur khanDar bhi sath rakho

kaDi hai dhup to KHwabon mein hi sahi 'razmi'

hari ruton ke ghanere shajar bhi sath rakho