KHwab bikhrenge to hum ko bhi bikharna hoga

ḳhvāb bikhreñge to ham ko bhī bikharnā hogā

shab kī ik ek aziyyat se guzarnā hogā

vo hamāre hī rag-o-pai meñ nihāñ rahtā hai

is kī tasdīq to ik din hameñ karnā hogā

apne ḳhākistar-e-tan ko liye kūche kūche

kyā havāoñ kī tarah mujh ko guzarnā hogā

hameñ ahbāb kī be-laus rifāqat ke sabab

vaqt aa.egā to be-maut bhī marnā hogā

hoñge sahrāoñ ke sannāTe nazar kī had meñ

koī vaadī na koī ḳhvāb na jharnā hogā

aa.ina aa.ina ḳhud saarī dishā.eñ hoñgī

aks-dar-aks magar ham ko ubharnā hogā

chīḳhte ḳhvāboñ kī ta.abīr yahī kahtī hai

hogī haḌtāl kahīñ to kahīñ dharnā hogā

KHwab bikhrenge to hum ko bhi bikharna hoga

shab ki ek ek aziyyat se guzarna hoga

wo hamare hi rag-o-pai mein nihan rahta hai

is ki tasdiq to ek din hamein karna hoga

apne KHakistar-e-tan ko liye kuche kuche

kya hawaon ki tarah mujh ko guzarna hoga

hamein ahbab ki be-laus rifaqat ke sabab

waqt aaega to be-maut bhi marna hoga

honge sahraon ke sannaTe nazar ki had mein

koi wadi na koi KHwab na jharna hoga

aaina aaina KHud sari dishaen hongi

aks-dar-aks magar hum ko ubharna hoga

chiKHte KHwabon ki tabir yahi kahti hai

hogi haDtal kahin to kahin dharna hoga