kis tarah par aise bad-KHu se safai kijiye

kis tarah par aise bad-ḳhū se safā.ī kījiye

jis kī tīnat meñ yahī ho kaj-adā.ī kījiye

jab masīhā kī ho marzī kaj-adā.ī kījiye

is jagah kyā dard-e-dil kī phir davā.ī kījiye

us se khiñch rahtā huuñ jab tab ye kahe hai mujh se dil

āshiqī yā kījiye yā mīrzā.ī kījiye

gar ye dil apnā kahe meñ apne hove nāsehā

baiTh kar kunj-e-qanā.at meñ ḳhudā.ī kījiye

kyā yahī thī shart kuchh insāf kī ai tund-ḳhū

jo bhalā ho aap se us se burā.ī kījiye

vo bhalā-chañgā huā bargashta mujh se aur bhī

kyā bayāñ naale kī apne nā-rasā.ī kījiye

khā gayā laġhzish qadam aisā butoñ ko dekh kar

jī meñ ye aayā ki tark-e-pārsā.ī kījiye

aks ho mālūm us kā ghar hī baiThe ai 'surūr'

pahle zañg-e-dil kī jab apne safā.ī kījiye

kis tarah par aise bad-KHu se safai kijiye

jis ki tinat mein yahi ho kaj-adai kijiye

jab masiha ki ho marzi kaj-adai kijiye

is jagah kya dard-e-dil ki phir dawai kijiye

us se khinch rahta hun jab tab ye kahe hai mujh se dil

aashiqi ya kijiye ya mirzai kijiye

gar ye dil apna kahe mein apne howe naseha

baiTh kar kunj-e-qanaat mein KHudai kijiye

kya yahi thi shart kuchh insaf ki ai tund-KHu

jo bhala ho aap se us se burai kijiye

wo bhala-changa hua bargashta mujh se aur bhi

kya bayan nale ki apne na-rasai kijiye

kha gaya laghzish qadam aisa buton ko dekh kar

ji mein ye aaya ki tark-e-parsai kijiye

aks ho malum us ka ghar hi baiThe ai 'surur'

pahle zang-e-dil ki jab apne safai kijiye