kise jaana kahan hai munhasir hota hai is par bhi

kise jaanā kahāñ hai munhasir hotā hai is par bhī

bhaTaktā hai koī bāhar to koī ghar ke bhītar bhī

kisī ko aas bādal se koī dariyāoñ kā tālib

agar hai tishna-lab sahrā to pyāsā hai samundar bhī

shikasta ḳhvāb kī kircheñ paḌī haiñ aañkh meñ shāyad

nazar meñ chubhtā hai jab tab adhūrā sā vo manzar bhī

surāġh is se hī lag jaa.e mire hone na hone kā

guzar kar dekh hī letā huuñ apne meñ se ho kar bhī

jise parchhā.īñ samjhe the haqīqat meñ na paikar ho

parakhnā chāhiye thā aap ko us shai ko chhū kar bhī

palaT kar muddatoñ ba.ad apnī tahrīroñ se guzrūñ to

lage aksar ki ho saktā thā is se aur behtar bhī

kise jaana kahan hai munhasir hota hai is par bhi

bhaTakta hai koi bahar to koi ghar ke bhitar bhi

kisi ko aas baadal se koi dariyaon ka talib

agar hai tishna-lab sahra to pyasa hai samundar bhi

shikasta KHwab ki kirchen paDi hain aankh mein shayad

nazar mein chubhta hai jab tab adhura sa wo manzar bhi

suragh is se hi lag jae mere hone na hone ka

guzar kar dekh hi leta hun apne mein se ho kar bhi

jise parchhain samjhe the haqiqat mein na paikar ho

parakhna chahiye tha aap ko us shai ko chhu kar bhi

palaT kar muddaton baad apni tahriron se guzrun to

lage aksar ki ho sakta tha is se aur behtar bhi