kitni diwaren uThi hain ek ghar ke darmiyan

kitnī dīvāreñ uThī haiñ ek ghar ke darmiyāñ

ghar kahīñ gum ho gayā dīvār-o-dar ke darmiyāñ

kaun ab is shahr meñ kis kī ḳhabar-gīrī kare

har koī gum ik hujūm-e-be-ḳhabar ke darmiyāñ

jagmagā.egā mirī pahchān ban kar muddatoñ

ek lamha an-ginat shaam o sahar ke darmiyāñ

ek saa.at thī ki sadiyoñ tak safar kartī rahī

kuchh zamāne the ki guzre lamha bhar ke darmiyāñ

vaar vo karte raheñge zaḳhm ham khāte raheñ

hai yahī rishta purānā sañg o sar ke darmiyāñ

kyā kahe har dekhne vaale ko āḳhir chup lagī

gum thā manzar iḳhtilāfāt-e-nazar ke darmiyāñ

kis kī aahaT par añdheroñ meñ qadam baḌhte ga.e

rūnumā thā kaun is andhe safar ke darmiyāñ

kuchh añdherā sā ujāloñ se gale miltā huā

ham ne ik manzar banāyā ḳhair-o-shar ke darmiyāñ

bastiyāñ 'maḳhmūr' yuuñ ujḌīñ ki sahrā ho ga.iiñ

fāsle baḌhne lage jab ghar se ghar ke darmiyāñ

kitni diwaren uThi hain ek ghar ke darmiyan

ghar kahin gum ho gaya diwar-o-dar ke darmiyan

kaun ab is shahr mein kis ki KHabar-giri kare

har koi gum ek hujum-e-be-KHabar ke darmiyan

jagmagaega meri pahchan ban kar muddaton

ek lamha an-ginat sham o sahar ke darmiyan

ek saat thi ki sadiyon tak safar karti rahi

kuchh zamane the ki guzre lamha bhar ke darmiyan

war wo karte rahenge zaKHm hum khate rahen

hai yahi rishta purana sang o sar ke darmiyan

kya kahe har dekhne wale ko aaKHir chup lagi

gum tha manzar iKHtilafat-e-nazar ke darmiyan

kis ki aahaT par andheron mein qadam baDhte gae

runuma tha kaun is andhe safar ke darmiyan

kuchh andhera sa ujalon se gale milta hua

hum ne ek manzar banaya KHair-o-shar ke darmiyan

bastiyan 'maKHmur' yun ujDin ki sahra ho gain

fasle baDhne lage jab ghar se ghar ke darmiyan