kya kahen hum the ki ya dida-e-tar baiTh gae

kyā kaheñ ham the ki yā dīda-e-tar baiTh ga.e

qulzum-e-ashk meñ juuñ laḳht-e-jigar baiTh ga.e

nā-tavāñ ham yuuñ tirī bazm se nikle kyūñkar

kise ma.alūm hai ham aa ke kidhar baiTh ga.e

aap ko ḳhuun ke aañsū hī rulānā hogā

hāl-e-dil kahne ko ham apnā agar baiTh ga.e

kis ko ik dam kā bharosa hai ki mānind-e-habāb

bahr-e-hastī meñ idhar aa.e udhar baiTh ga.e

duur samjhā hai raqīboñ ko yahāñ se 'ārif'

yaar ke paas jo be-ḳhauf-o-ḳhatar baiTh ga.e

kya kahen hum the ki ya dida-e-tar baiTh gae

qulzum-e-ashk mein jun laKHt-e-jigar baiTh gae

na-tawan hum yun teri bazm se nikle kyunkar

kise malum hai hum aa ke kidhar baiTh gae

aap ko KHun ke aansu hi rulana hoga

haal-e-dil kahne ko hum apna agar baiTh gae

kis ko ek dam ka bharosa hai ki manind-e-habab

bahr-e-hasti mein idhar aae udhar baiTh gae

dur samjha hai raqibon ko yahan se 'arif'

yar ke pas jo be-KHauf-o-KHatar baiTh gae