lafzon ki wasile se bayan hone se pahle

lafzoñ ki vasīle se bayāñ hone se pahle

āsān thā ye kaam girāñ hone se pahle

taḳhlīq ne chhīnā hai mirā husn bhī mujh se

ik raaz thā maiñ mere ayaañ hone se pahle

kis tarah kī bīnā.ī thī in āñkhoñ meñ jaane

kuchh bhī na dikhā jin ko dhuāñ hone se pahle

sochā to bahut par koī ma.anī nahīñ nikle

kyā merī nahīñ thī mirī haañ hone se pahle

ye ishq to ab aa ke mirī jaan huā hai

nāsūr-e-jigar thā rag-e-jāñ hone se pahle

ham jaise namāzī tumheñ DhūñDe na mileñge

paḌhte hoñ namāzeñ jo azaañ hone se pahle

haiñ saare fasādāt zabānoñ kā natīja

ḳhāmosh thā insān zabāñ hone se pahle

maiñ sochtā rahtā huuñ ba-har-hāl ki kyā thā

āñkhoñ meñ tirī merā jahāñ hone se pahle

lafzon ki wasile se bayan hone se pahle

aasan tha ye kaam giran hone se pahle

taKHliq ne chhina hai mera husn bhi mujh se

ek raaz tha main mere ayan hone se pahle

kis tarah ki binai thi in aankhon mein jaane

kuchh bhi na dikha jin ko dhuan hone se pahle

socha to bahut par koi mani nahin nikle

kya meri nahin thi meri han hone se pahle

ye ishq to ab aa ke meri jaan hua hai

nasur-e-jigar tha rag-e-jaan hone se pahle

hum jaise namazi tumhein DhunDe na milenge

paDhte hon namazen jo azan hone se pahle

hain sare fasadat zabanon ka natija

KHamosh tha insan zaban hone se pahle

main sochta rahta hun ba-har-haal ki kya tha

aankhon mein teri mera jahan hone se pahle