lahje ki udasi kam hogi baaton mein khanak aa jaegi

lahje kī udāsī kam hogī bātoñ meñ khanak aa jā.egī

do-roz hamāre saath raho chehre pe chamak aa jā.egī

ye chāñd-sitāroñ kī mahfil ma.alūm nahīñ kab raushan ho

tum paas raho tum saath raho jazboñ meñ kasak aa jā.egī

kuchh der meñ bādal barseñge kuchh der meñ sāvan jūmeñge

tum zulf yuuñ hī lahrā.e raho mausam meñ sanak aa jā.egī

jab us kī malāhat ke qisse likkhūñgā ġhazal ke sheroñ meñ

har rūkhe-phīke misre meñ tāsīr-e-namak aa jā.egī

sūraj ko zarā kuchh Dhalne do kuchh vaqt kā dariyā bahne do

jo dhuup abhī tak sar par hai vo paañv talak aa jā.egī

ye soch ke tere qadmoñ kī kuchh ḳhaak uḌā dī gulshan meñ

har phuul meñ tere chehre kī thoḌī sī jhalak aa jā.egī

jis baat kā matlab ḳhushbū hai har gaañv ke kachche raste par

us baat kā matlab badlegā jab pakkī saḌak aa jā.egī

ye pyaar kā din hai pyaar kā din iqrār karo 'anjum'-sāhab

is din kī zarā sī qadr karo jīvan meñ mahak aa jā.egī

lahje ki udasi kam hogi baaton mein khanak aa jaegi

do-roz hamare sath raho chehre pe chamak aa jaegi

ye chand-sitaron ki mahfil malum nahin kab raushan ho

tum pas raho tum sath raho jazbon mein kasak aa jaegi

kuchh der mein baadal barsenge kuchh der mein sawan jumenge

tum zulf yun hi lahrae raho mausam mein sanak aa jaegi

jab us ki malahat ke qisse likkhunga ghazal ke sheron mein

har rukhe-phike misre mein tasir-e-namak aa jaegi

suraj ko zara kuchh Dhalne do kuchh waqt ka dariya bahne do

jo dhup abhi tak sar par hai wo panw talak aa jaegi

ye soch ke tere qadmon ki kuchh KHak uDa di gulshan mein

har phul mein tere chehre ki thoDi si jhalak aa jaegi

jis baat ka matlab KHushbu hai har ganw ke kachche raste par

us baat ka matlab badlega jab pakki saDak aa jaegi

ye pyar ka din hai pyar ka din iqrar karo 'anjum'-sahab

is din ki zara si qadr karo jiwan mein mahak aa jaegi