larazti chhat shikasta baam-o-dar se baat karni hai

laraztī chhat shikasta bām-o-dar se baat karnī hai

mujhe tanhā.ī meñ kuchh apne ghar se baat karnī hai

bikharne ke marāhil meñ sahārā kyuuñ diyā mujh ko

mirī miTTī ne dast-e-kūza-gar se baat karnī hai

kiyā thā jaan de ke ham ne kār-e-āshiyāñ-bandī

jalāyā kis liye barq-o-sharar se baat karnī hai

muqābil husn jab aa.e sitam-zādoñ kī mahfil meñ

zabāñ ko qaid karnā hai nazar se baat karnī hai

badal Daalā hai duniyā ko jo fir.aunoñ kī bastī meñ

ḳhudā ne aaj shāyad phir bashar se baat karnī hai

mire paañv meñ Daalī hai ye zanjīr-e-āsā.ish

jo saa.e bāñTtā hai us shajar se baat karnī hai

jo mujh meñ dūsrā hai sab jise 'mansūr' kahte haiñ

mujhe bhī aaj us shorīda-sar se baat karnī hai

larazti chhat shikasta baam-o-dar se baat karni hai

mujhe tanhai mein kuchh apne ghar se baat karni hai

bikharne ke marahil mein sahaara kyun diya mujh ko

meri miTTi ne dast-e-kuza-gar se baat karni hai

kiya tha jaan de ke hum ne kar-e-ashiyan-bandi

jalaya kis liye barq-o-sharar se baat karni hai

muqabil husn jab aae sitam-zadon ki mahfil mein

zaban ko qaid karna hai nazar se baat karni hai

badal Dala hai duniya ko jo firaunon ki basti mein

KHuda ne aaj shayad phir bashar se baat karni hai

mere panw mein Dali hai ye zanjir-e-asaish

jo sae banTta hai us shajar se baat karni hai

jo mujh mein dusra hai sab jise 'mansur' kahte hain

mujhe bhi aaj us shorida-sar se baat karni hai