mah-o-anjum ne qaba ki to tumhaare liye ki

mah-o-anjum ne qabā kī to tumhāre liye kī

chāñd chehroñ pe ridā kī to tumhāre liye kī

vo bhī thā mauj meñ ye dil bhī bahakne hī ko thā

apne hāthoñ ne hayā kī to tumhāre liye kī

koh-o-sahrā meñ bhaTakte sar-e-sāhil phirte

maiñ ne har gaam sadā kī to tumhāre liye kī

dil ke is tapte hue tund bayābāñ ke biich

maiñ ne ik nahr banā kī to tumhāre liye kī

mujh se thā barsar-e-kīñ rabt-e-nihāñ tum se thā

dil ne gar tum se vafā kī to tumhāre liye kī

raat mavvāj thī jab haath uThe us ke huzūr

sab se pahle jo duā kī to tumhāre liye kī

maiñ kahāñ aur kahāñ shā.erī maiñ ne to faqat

majlis-e-sher bapā kī to tumhāre liye kī

mah-o-anjum ne qaba ki to tumhaare liye ki

chand chehron pe rida ki to tumhaare liye ki

wo bhi tha mauj mein ye dil bhi bahakne hi ko tha

apne hathon ne haya ki to tumhaare liye ki

koh-o-sahra mein bhaTakte sar-e-sahil phirte

main ne har gam sada ki to tumhaare liye ki

dil ke is tapte hue tund bayaban ke bich

main ne ek nahr bana ki to tumhaare liye ki

mujh se tha barsar-e-kin rabt-e-nihan tum se tha

dil ne gar tum se wafa ki to tumhaare liye ki

raat mawwaj thi jab hath uThe us ke huzur

sab se pahle jo dua ki to tumhaare liye ki

main kahan aur kahan shaeri main ne to faqat

majlis-e-sher bapa ki to tumhaare liye ki