main jis ko rah dikhaun wahi haTae mujhe

maiñ jis ko raah dikhā.ūñ vahī haTā.e mujhe

maiñ naqsh-e-pā huuñ koī ḳhaak se uThā.e mujhe

mahak uThegī fazā mere tan kī ḳhushbū se

maiñ uud huuñ kabhī aa kar koī jalā.e mujhe

charāġh huuñ to faqat taaq kyuuñ muqaddar ho

koī zamāne ke dariyā meñ bhī bahā.e mujhe

maiñ musht-e-ḳhāk huuñ sahrā mirī tamannā hai

havā-e-tez kisī taur se uḌaa.e mujhe

agar mirā hai to utre kabhī mire ghar meñ

vo chāñd ban ke na yuuñ duur se lubhā.e mujhe

vo aa.ine kī tarah mere sāmne aa.e

mujhe nahīñ to mirā aks hī dikhā.e mujhe

umañDtī yādoñ ke āshob se meñ vāqif huuñ

ḳhudā kare kisī sūrat vo bhuul jaa.e mujhe

vafā nigāh kī tālib hai imtihāñ kī nahīñ

vo merī ruuh meñ jhāñke na āzmā.e mujhe

main jis ko rah dikhaun wahi haTae mujhe

main naqsh-e-pa hun koi KHak se uThae mujhe

mahak uThegi faza mere tan ki KHushbu se

main ud hun kabhi aa kar koi jalae mujhe

charagh hun to faqat taq kyun muqaddar ho

koi zamane ke dariya mein bhi bahae mujhe

main musht-e-KHak hun sahra meri tamanna hai

hawa-e-tez kisi taur se uDae mujhe

agar mera hai to utre kabhi mere ghar mein

wo chand ban ke na yun dur se lubhae mujhe

wo aaine ki tarah mere samne aae

mujhe nahin to mera aks hi dikhae mujhe

umanDti yaadon ke aashob se mein waqif hun

KHuda kare kisi surat wo bhul jae mujhe

wafa nigah ki talib hai imtihan ki nahin

wo meri ruh mein jhanke na aazmae mujhe