manzar sameT lae hain jo tere ganw ke

manzar sameT laa.e haiñ jo tere gaañv ke

nīñdeñ churā rahe haiñ vo jhoñke havāoñ ke

terī galī se chāñd ziyāda hasīñ nahīñ

kahte sune ga.e haiñ musāfir ḳhalāoñ ke

pal bhar ko terī yaad meñ dhaḌkā thā dil mirā

ab duur tak bhañvar se paḌe haiñ sadāoñ ke

dād-e-safar milī hai kise rāh-e-shauq meñ

ham ne miTā diye haiñ nishāñ apne paañv ke

jab tak na koī aas thī ye pyaas bhī na thī

bechain kar ga.e hameñ saa.e ghaTāoñ ke

ham ne liyā hai jab bhī kisī rāhzan kā naam

chehre utar utar ga.e kuchh rahnumāoñ ke

uglegā āftāb kuchh aisī balā kī dhuup

rah jā.eñge zamīn pe kuchh daaġh chhāñv ke

manzar sameT lae hain jo tere ganw ke

ninden chura rahe hain wo jhonke hawaon ke

teri gali se chand ziyaada hasin nahin

kahte sune gae hain musafir KHalaon ke

pal bhar ko teri yaad mein dhaDka tha dil mera

ab dur tak bhanwar se paDe hain sadaon ke

dad-e-safar mili hai kise rah-e-shauq mein

hum ne miTa diye hain nishan apne panw ke

jab tak na koi aas thi ye pyas bhi na thi

bechain kar gae hamein sae ghaTaon ke

hum ne liya hai jab bhi kisi rahzan ka nam

chehre utar utar gae kuchh rahnumaon ke

uglega aaftab kuchh aisi bala ki dhup

rah jaenge zamin pe kuchh dagh chhanw ke