mata-e-dard ka KHugar meri talash mein hai

matā-e-dard kā ḳhūgar mirī talāsh meñ hai

kisī kā bhejā payambar mirī talāsh meñ hai

huuñ maiñ hī nuqta-e-āġhāz iḳhtitām-e-hisār

har ik hisār kā mehvar mirī talāsh meñ hai

milī hai auj ḳhudī ko yaqīn-e-mohkam se

sunā hai marzī-e-dāvar mirī talāsh meñ hai

vo ek sa.ī jise kahte haiñ ham sabhī idrāk

vo mere jism ke andar mirī talāsh meñ hai

sabhī to dost haiñ kyuuñ shak abas huā mujh ko

kisī ke haath kā patthar mirī talāsh meñ hai

mire ḳhudā maiñ huuñ tujh se panāh kā tālib

mire gunāhoñ kā lashkar mirī talāsh meñ hai

mire hī lams se ġhunchoñ ne paa.ī shādābī

chaman meñ khiltā gul-e-tar mirī talāsh meñ hai

kahīñ se sun liyā hai merī pyaas kā charchā

tabhī se pyāsā samundar mirī talāsh meñ hai

lagā hai sochne ahd-e-ravāñ kā 'marhab' bhī

bachūñgā kis tarah 'haidar' mirī talāsh meñ hai

mata-e-dard ka KHugar meri talash mein hai

kisi ka bheja payambar meri talash mein hai

hun main hi nuqta-e-aghaz iKHtitam-e-hisar

har ek hisar ka mehwar meri talash mein hai

mili hai auj KHudi ko yaqin-e-mohkam se

suna hai marzi-e-dawar meri talash mein hai

wo ek sai jise kahte hain hum sabhi idrak

wo mere jism ke andar meri talash mein hai

sabhi to dost hain kyun shak abas hua mujh ko

kisi ke hath ka patthar meri talash mein hai

mere KHuda main hun tujh se panah ka talib

mere gunahon ka lashkar meri talash mein hai

mere hi lams se ghunchon ne pai shadabi

chaman mein khilta gul-e-tar meri talash mein hai

kahin se sun liya hai meri pyas ka charcha

tabhi se pyasa samundar meri talash mein hai

laga hai sochne ahd-e-rawan ka 'marhab' bhi

bachunga kis tarah 'haidar' meri talash mein hai