mausam-e-yaad yun ujlat mein na ware jaen

mausam-e-yād yuuñ ujlat meñ na vaare jaa.eñ

ham vo lamhe haiñ jo fursat se guzāre jaa.eñ

ho ke rusvā vo huā jis kī kabhī hasrat thī

ham tire naam se mahfil meñ pukāre jaa.eñ

aap kā husn hai jitnā bhī numā.ish kiije

haañ bas itnā hai ki ma.asūm na maare jaa.eñ

yaañ se ab rāh-e-adam sū-e-falak jaatī hai

aa.iye paañv havāoñ meñ utāre jaa.eñ

ik tire naam kā thā saath ki ab vo bhī nahīñ

ab tire shahr bhalā kis ke sahāre jaa.eñ

ḳhāmushī toḌ ke sar le lī ye kaisī vahshat

aisā lagtā hai ki bas tum ko pukāre jaa.eñ

ho chukā tañg maiñ zindān-e-ḳhamoshāñ se bahut

kuchh parinde hī mirī chhat pe utāre jaa.eñ

zindagī bhī to kabhī maujoñ se laḌ kar dekhe

sirf kyā ham ko ġharaz hai ki kināre jaa.eñ

aaj kī raat añdheroñ kī hai darkār mujhe

aaj kī raat mirī chhat se sitāre jaa.eñ

mausam-e-yaad yun ujlat mein na ware jaen

hum wo lamhe hain jo fursat se guzare jaen

ho ke ruswa wo hua jis ki kabhi hasrat thi

hum tere nam se mahfil mein pukare jaen

aap ka husn hai jitna bhi numaish kije

han bas itna hai ki masum na mare jaen

yan se ab rah-e-adam su-e-falak jati hai

aaiye panw hawaon mein utare jaen

ek tere nam ka tha sath ki ab wo bhi nahin

ab tere shahr bhala kis ke sahaare jaen

KHamushi toD ke sar le li ye kaisi wahshat

aisa lagta hai ki bas tum ko pukare jaen

ho chuka tang main zindan-e-KHamoshan se bahut

kuchh parinde hi meri chhat pe utare jaen

zindagi bhi to kabhi maujon se laD kar dekhe

sirf kya hum ko gharaz hai ki kinare jaen

aaj ki raat andheron ki hai darkar mujhe

aaj ki raat meri chhat se sitare jaen