mera shahid wo hamein ayyar aata hai nazar

merā shāhid vo hameñ ayyār aatā hai nazar

ham ko ham paate nahīñ jab yaar aatā hai nazar

kasrat-e-shauq-e-mohabbat meñ mujhe har tarah se

jis taraf dekhūñ ruḳh-e-dil-dār aatā hai nazar

jaan kā dhokā hameñ hotā hai rāh-e-ishq meñ

marg kā har ek dam āsār aatā hai nazar

dāġh-e-hijrāñ ke sivā laayā na kū-e-yār se

jo koī is raah kā bīmār aatā hai nazar

pā-barahna siina biryāñ hai tan-e-uryāñ vahī

jo ki us kā āshiq-e-sarshār aatā hai nazar

raah se dair-o-haram kī hai jo kū-e-yār meñ

hai vahī dīñ-dār gar kuffār aatā hai nazar

ba.ad muddat gardish-e-tasbīh se 'miskīñ' hameñ

dāna-e-tasbīh meñ zunnār aatā hai nazar

mera shahid wo hamein ayyar aata hai nazar

hum ko hum pate nahin jab yar aata hai nazar

kasrat-e-shauq-e-mohabbat mein mujhe har tarah se

jis taraf dekhun ruKH-e-dil-dar aata hai nazar

jaan ka dhoka hamein hota hai rah-e-ishq mein

marg ka har ek dam aasar aata hai nazar

dagh-e-hijran ke siwa laya na ku-e-yar se

jo koi is rah ka bimar aata hai nazar

pa-barahna sina biryan hai tan-e-uryan wahi

jo ki us ka aashiq-e-sarshaar aata hai nazar

rah se dair-o-haram ki hai jo ku-e-yar mein

hai wahi din-dar gar kuffar aata hai nazar

baad muddat gardish-e-tasbih se 'miskin' hamein

dana-e-tasbih mein zunnar aata hai nazar