meri yaaden bhala tum kis tarah dil se miTaoge

mirī yādeñ bhalā tum kis tarah dil se miTāoge

bhulā kar to zarā dekho mujhe kaise bhulāoge

mohabbat karne vaale dard meñ tanhā nahīñ hote

jo rūThoge kabhī mujh se to apnā dil dukhāoge

karoge yaad tum guzre zamānoñ kī sabhī bāteñ

kabhī itrā ke hañs doge kabhī aañsū bahāoge

guzar jaate haiñ jo lamhe kabhī vāpas nahīñ aate

to biite pal mohabbat ke kahāñ se le ke aaoge

judā apnoñ se ho kar TuuT jaatā hai koī kaise

jo bichhḌoge kabhī mujh se to ḳhud hī jaan jāoge

baḌhā loge agar tum fāsle mujh se kabhī 'āzim'

to rūdād-e-dil-e-nāshād phir kis ko sunāoge

meri yaaden bhala tum kis tarah dil se miTaoge

bhula kar to zara dekho mujhe kaise bhulaoge

mohabbat karne wale dard mein tanha nahin hote

jo ruThoge kabhi mujh se to apna dil dukhaoge

karoge yaad tum guzre zamanon ki sabhi baaten

kabhi itra ke hans doge kabhi aansu bahaoge

guzar jate hain jo lamhe kabhi wapas nahin aate

to bite pal mohabbat ke kahan se le ke aaoge

juda apnon se ho kar TuT jata hai koi kaise

jo bichhDoge kabhi mujh se to KHud hi jaan jaoge

baDha loge agar tum fasle mujh se kabhi 'azim'

to rudad-e-dil-e-nashad phir kis ko sunaoge