mohabbat kya mohabbat ka sila kya

mohabbat kyā mohabbat kā silā kyā

ġham-e-barbādi-e-jins-e-vafā kyā

dil-e-be-mudda.ā kā mudda.ā kyā

hamārā haal ham se pūchhnā kyā

hameñ duniyā meñ apne ġham se matlab

zamāne kī ḳhushī se vāstā kyā

sitam-hā-e-farāvāñ chāhtā huuñ

karam kī aarzū kyā iltijā kyā

ham us ke aur us kā ġham hamārā

is andāz-e-karam kā pūchhnā kyā

rahā dil ko na ab zauq-e-sitam kyuuñ

vo haiñ āmāda-e-tark-e-jafā kyā

tire ġham ke sahāre jī rahe haiñ

hamārī aarzū kyā mudda.ā kyā

bahāroñ par ḳhizāñ sarf-e-asar hai

ma.āl-e-ġhunch-o-gul dekhnā kyā

ta.alluq aur tire ġham se ta.alluq

urūj-e-baḳht-e-'aḳhtar' pūchhnā kyā

mohabbat kya mohabbat ka sila kya

gham-e-barbaadi-e-jins-e-wafa kya

dil-e-be-muddaa ka muddaa kya

hamara haal hum se puchhna kya

hamein duniya mein apne gham se matlab

zamane ki KHushi se wasta kya

sitam-ha-e-farawan chahta hun

karam ki aarzu kya iltija kya

hum us ke aur us ka gham hamara

is andaz-e-karam ka puchhna kya

raha dil ko na ab zauq-e-sitam kyun

wo hain aamada-e-tark-e-jafa kya

tere gham ke sahaare ji rahe hain

hamari aarzu kya muddaa kya

bahaaron par KHizan sarf-e-asar hai

maal-e-ghunch-o-gul dekhna kya

talluq aur tere gham se talluq

uruj-e-baKHt-e-'aKHtar' puchhna kya