mohmal hai na jaanen to, samjhen to wazahat hai

mohmal hai na jāneñ to, samjheñ to vazāhat hai

hai ziist faqat dhokā aur maut haqīqat hai

ham par ye 'ināyat bhii, kyā terī mohabbat hai

aanā bhī qayāmat hai jaanā bhī qayāmat hai

khultā hī nahīñ us kī in ḳhaas adāoñ meñ

tamhīd-e-mohabbat hai, zid hai ki sharārat hai

tauhīn-e-vafā hai ye, hangāma hai kyuuñ itnā

is dasht-e-vafā meñ kyā pahlī ye shahādat hai

badlā hai zamāna bas, hālāt nahīñ badle

haq-goī meñ logoñ ko ab bhī to qabāhat hai

ik zid ke sabab donoñ mashkūk haiñ ab tak bhī

inkār hai hoñToñ par āñkhoñ meñ mohabbat hai

ye ma.arka-ārā.ī kyā ek taraf se thī

kuchh apne kiye par bhī kyā tum ko nadāmat hai

kuchh tū hī batā āḳhir kyūñ-kar tire bandoñ par

har shab hai na.ī aafat har roz musībat hai

mānā, ho tamāshā.ī tum zulm-e-musalsal ke

lekin ye ḳhamoshī bhī zālim kī himāyat hai

tū apnī ḳhatāoñ par nādim bhī zarā ho jā

ai dost agar tujh meñ thoḌī bhī sharāfat hai

kuchh dahr-parastoñ ne saffāk-dilī bartī

kuchh had se ziyāda hī ham meñ bhī sharāfat hai

kyā shauq-e-junūñ thā jo aa.e the yahāñ 'ḳhālid'

is dasht-e-vafā meñ to har lamha aziyyat hai

mohmal hai na jaanen to, samjhen to wazahat hai

hai zist faqat dhoka aur maut haqiqat hai

hum par ye 'inayat bhi, kya teri mohabbat hai

aana bhi qayamat hai jaana bhi qayamat hai

khulta hi nahin us ki in KHas adaon mein

tamhid-e-mohabbat hai, zid hai ki shararat hai

tauhin-e-wafa hai ye, hangama hai kyun itna

is dasht-e-wafa mein kya pahli ye shahadat hai

badla hai zamana bas, haalat nahin badle

haq-goi mein logon ko ab bhi to qabahat hai

ek zid ke sabab donon mashkuk hain ab tak bhi

inkar hai honTon par aankhon mein mohabbat hai

ye marka-arai kya ek taraf se thi

kuchh apne kiye par bhi kya tum ko nadamat hai

kuchh tu hi bata aaKHir kyun-kar tere bandon par

har shab hai nai aafat har roz musibat hai

mana, ho tamashai tum zulm-e-musalsal ke

lekin ye KHamoshi bhi zalim ki himayat hai

tu apni KHataon par nadim bhi zara ho ja

ai dost agar tujh mein thoDi bhi sharafat hai

kuchh dahr-paraston ne saffak-dili barti

kuchh had se ziyaada hi hum mein bhi sharafat hai

kya shauq-e-junun tha jo aae the yahan 'KHalid'

is dasht-e-wafa mein to har lamha aziyyat hai