mujh sa betab yahan koi nahin mere siwa

mujh sā betāb yahāñ koī nahīñ mere sivā

ya.anī barbād-e-jahāñ koī nahīñ mere sivā

raushnī thī to ka.ī saa.e nazar aate the

tīrgī hai to yahāñ koī nahīñ mere sivā

bhiiḌ meñ ek taraf gosha-e-iḳhlās bhī hai

ġhaur se dekh vahāñ koī nahīñ mere sivā

shahr mere hī bharose pe ho ḳhufta jaise

hadaf-e-shor-e-sagāñ koī nahīñ mere sivā

sar-bulandī mirī tanhā.ī tak aa pahuñchī hai

maiñ vahāñ huuñ ki jahāñ koī nahīñ mere sivā

sher meñ ġhair kī tashbīh kahāñ se aa.e

merī mānind yahāñ koī nahīñ mere sivā

chain likhtā hai mire ḳhvāb kā raavī 'rāshid'

is samundar meñ ravāñ koī nahīñ mere sivā

mujh sa betab yahan koi nahin mere siwa

yani barbaad-e-jahan koi nahin mere siwa

raushni thi to kai sae nazar aate the

tirgi hai to yahan koi nahin mere siwa

bhiD mein ek taraf gosha-e-iKHlas bhi hai

ghaur se dekh wahan koi nahin mere siwa

shahr mere hi bharose pe ho KHufta jaise

hadaf-e-shor-e-sagan koi nahin mere siwa

sar-bulandi meri tanhai tak aa pahunchi hai

main wahan hun ki jahan koi nahin mere siwa

sher mein ghair ki tashbih kahan se aae

meri manind yahan koi nahin mere siwa

chain likhta hai mere KHwab ka rawi 'rashid'

is samundar mein rawan koi nahin mere siwa