nam hi kya nishan hi kya KHwab-o-KHayal ho gae

naam hī kyā nishāñ hī kyā ḳhvāb-o-ḳhayāl ho ga.e

terī misāl de ke ham terī misāl ho ga.e

sāya-e-zāt se bhī ram aks-e-sifāt se bhī ram

dasht-e-ġhazal meñ aa ke dekh ham to ġhazāl ho ga.e

kahte hī nashsha-hā-e-zauq kitne hī jazba-hā-e-shauq

rasm-e-tapāk-e-yār se rū-ba-zavāl ho ga.e

ishq hai apnā pā.edār terī vafā hai ustuvār

ham to halāk-e-varzish-e-farz-e-muhāl ho ga.e

jāda-e-shauq meñ paḌā qaht-e-ġhubār-e-kārvāñ

vaañ ke shajar to sar-ba-sar dast-e-savāl ho ga.e

saḳht zamīñ-parast the ahd-e-vafā ke pāsdār

uḌ ke bulandiyoñ meñ ham gard-e-malāl ho ga.e

qurb-e-jamāl aur ham aish-e-visāl aur ham

haañ ye huā ki sākin-e-shahr-e-jamāl ho ga.e

ham-nafasān-e-vaz.a-dār mustami.ān-e-burd-bār

ham to tumhāre vāste ek vabāl ho ga.e

kaun sā qāfila hai ye jis ke jaras kā hai ye shor

maiñ to niDhāl ho gayā ham to niDhāl ho ga.e

ḳhār-ba-ḳhār gul-ba-gul fasl-e-bahār aa ga.ī

fasl-e-bahār aa ga.ī zaḳhm bahāl ho ga.e

shor uThā magar tujhe lazzat-e-gosh to milī

ḳhuun bahā magar tire haath to laal ho ga.e

'jaun' karoge kab talak apnā misāliya talāsh

ab ka.ī hijr ho chuke ab ka.ī saal ho ga.e

nam hi kya nishan hi kya KHwab-o-KHayal ho gae

teri misal de ke hum teri misal ho gae

saya-e-zat se bhi ram aks-e-sifat se bhi ram

dasht-e-ghazal mein aa ke dekh hum to ghazal ho gae

kahte hi nashsha-ha-e-zauq kitne hi jazba-ha-e-shauq

rasm-e-tapak-e-yar se ru-ba-zawal ho gae

ishq hai apna paedar teri wafa hai ustuwar

hum to halak-e-warzish-e-farz-e-muhaal ho gae

jada-e-shauq mein paDa qaht-e-ghubar-e-karwan

wan ke shajar to sar-ba-sar dast-e-sawal ho gae

saKHt zamin-parast the ahd-e-wafa ke pasdar

uD ke bulandiyon mein hum gard-e-malal ho gae

qurb-e-jamal aur hum aish-e-visal aur hum

han ye hua ki sakin-e-shahr-e-jamal ho gae

ham-nafasan-e-waza-dar mustamian-e-burd-bar

hum to tumhaare waste ek wabaal ho gae

kaun sa qafila hai ye jis ke jaras ka hai ye shor

main to niDhaal ho gaya hum to niDhaal ho gae

KHar-ba-KHar gul-ba-gul fasl-e-bahaar aa gai

fasl-e-bahaar aa gai zaKHm bahaal ho gae

shor uTha magar tujhe lazzat-e-gosh to mili

KHun baha magar tere hath to lal ho gae

'jaun' karoge kab talak apna misaliya talash

ab kai hijr ho chuke ab kai sal ho gae