nadim bagh mein josh-e-numu ki baat na kar

nadīm baaġh meñ josh-e-numū kī baat na kar

bahār aa to ga.ī rañg-o-bū kī baat na kar

ajiib bhūl-bhulayyāñ hai shāhrāh-e-hayat

bhaTakne vaale yahāñ justujū kī baat na kar

tabāh kar na mazāq-e-junūñ kī ḳhuddārī

dil-e-tabāh kisī tund-ḳhū kī baat na kar

ḳhud apne tarz-e-amal ko sañvār aur sañvār

mire rafīq tarīq-e-adū kī baat na kar

gurez-e-husn ko andāz-e-husn kahte haiñ

nazar se dekh magar ḳhūb-rū kī baat na kar

ye barq-e-husn jalātī to hai magar nāseh

vo aur shai hai mire sho.ala-ḳhū kī baat na kar

ye mai-kade kī fazā kah rahī hai ai 'aḳhtar'

ki tishnagī meñ bhī jām-o-subū kī baat na kar

nadim bagh mein josh-e-numu ki baat na kar

bahaar aa to gai rang-o-bu ki baat na kar

ajib bhul-bhulayyan hai shahrah-e-hayat

bhaTakne wale yahan justuju ki baat na kar

tabah kar na mazaq-e-junun ki KHuddari

dil-e-tabah kisi tund-KHu ki baat na kar

KHud apne tarz-e-amal ko sanwar aur sanwar

mere rafiq tariq-e-adu ki baat na kar

gurez-e-husn ko andaz-e-husn kahte hain

nazar se dekh magar KHub-ru ki baat na kar

ye barq-e-husn jalati to hai magar naseh

wo aur shai hai mere shoala-KHu ki baat na kar

ye mai-kade ki faza kah rahi hai ai 'aKHtar'

ki tishnagi mein bhi jam-o-subu ki baat na kar