nafraton se chehra chehra gard tha

nafratoñ se chehra chehra gard thā

mujrim-e-insāniyat har fard thā

kuchh havāoñ meñ bhī thā ḳhauf-o-hirās

kuchh fazāoñ kā bhī chehra zard thā

be-hisī meñ dafn thī insāniyat

ādamiyyat kā bhī lahja sard thā

apne kāñdhoñ par uThā.e apnā bojh

koī āvāra koī shab-gard thā

phuul se chehre the murjhā.e hue

shahr-e-gul bhī aaj shahr-e-dard thā

jis ne duniyā bhar ke ġham apnā.e the

us ko duniyā ne kahā be-dard thā

sach to 'aḳhtar' ye hai us māhaul meñ

merā dushman hī mirā hamdard thā

nafraton se chehra chehra gard tha

mujrim-e-insaniyat har fard tha

kuchh hawaon mein bhi tha KHauf-o-hiras

kuchh fazaon ka bhi chehra zard tha

be-hisi mein dafn thi insaniyat

aadamiyyat ka bhi lahja sard tha

apne kandhon par uThae apna bojh

koi aawara koi shab-gard tha

phul se chehre the murjhae hue

shahr-e-gul bhi aaj shahr-e-dard tha

jis ne duniya bhar ke gham apnae the

us ko duniya ne kaha be-dard tha

sach to 'aKHtar' ye hai us mahaul mein

mera dushman hi mera hamdard tha