nashshe mein chashm-e-naz jo hansti nazar paDi

nashshe meñ chashm-e-nāz jo hañstī nazar paḌī

tasvīr-e-hoshiyārī-o-mastī nazar paḌī

lahrā.ī ek baar vo zulf-e-ḳhirad-shikār

koī na phir bulandī-o-pastī nazar paḌī

uTThī thī pahlī baar jidhar chashm-e-ārzū

vo log phir mile na vo bastī nazar paḌī

husn-e-butāñ to ā.īna-e-husn-e-zāt hai

zāhid ko us meñ kufr-parastī nazar paḌī

yārab kabhī tū bul-havasoñ ko bhī de sazā

maanā hamārī jaan to sastī nazar paḌī

sū-e-chaman ga.e the bahārāñ samajh ke ham

dekhā to ek āg-parastī nazar paḌī

kaisī sabā kahāñ kī nasīm-e-chaman na pūchh

nāgin sī phuul phuul ko Dastī nazar paḌī

muddat ke ba.ad apnī taraf phir gayā ḳhayāl

tum kyā mile ki sūrat-e-hastī nazar paḌī

shabnam kī buuñd buuñd ne hañs hañs ke jaan dī

'tāhir' kiran kiran bhī tarastī nazar paḌī

nashshe mein chashm-e-naz jo hansti nazar paDi

taswir-e-hoshiyari-o-masti nazar paDi

lahrai ek bar wo zulf-e-KHirad-shikar

koi na phir bulandi-o-pasti nazar paDi

uTThi thi pahli bar jidhar chashm-e-arzu

wo log phir mile na wo basti nazar paDi

husn-e-butan to aaina-e-husn-e-zat hai

zahid ko us mein kufr-parasti nazar paDi

yarab kabhi tu bul-hawason ko bhi de saza

mana hamari jaan to sasti nazar paDi

su-e-chaman gae the bahaaran samajh ke hum

dekha to ek aag-parasti nazar paDi

kaisi saba kahan ki nasim-e-chaman na puchh

nagin si phul phul ko Dasti nazar paDi

muddat ke baad apni taraf phir gaya KHayal

tum kya mile ki surat-e-hasti nazar paDi

shabnam ki bund bund ne hans hans ke jaan di

'tahir' kiran kiran bhi tarasti nazar paDi