nau-ba-nau ek umaDta hua tufan tha main

nau-ba-nau ek umaDtā huā tūfān thā maiñ

bahte dariyā ke liye ik yahī pahchān thā maiñ

maiñ kisī nuqta-e-be-lafz kā iz.hār nahīñ

haañ kabhī harf-e-anā vaqt kā irfān thā maiñ

detī thī zauq-e-nazar mujh ko gunah kī tarġhīb

yuuñ farishta to na thā haañ magar insān thā maiñ

un se ai dost mirā yuuñ koī rishta to na thā

kyuuñ phir is tark-e-ta.alluq se pashemān thā maiñ

kis tasavvur ke tahat rabt kī manzil meñ rahā

kis vasīle ke ta.assur kā nigahbān thā maiñ

phir pas-e-lafz yahī baat uThī thī kal shab

bikhre lafzoñ ke liye bā.is-e-haijān thā maiñ

is kahānī meñ koī rabt o tasalsul bhī nahīñ

kyuuñ ki is ziist kā sāhil yahī unvān thā maiñ

nau-ba-nau ek umaDta hua tufan tha main

bahte dariya ke liye ek yahi pahchan tha main

main kisi nuqta-e-be-lafz ka izhaar nahin

han kabhi harf-e-ana waqt ka irfan tha main

deti thi zauq-e-nazar mujh ko gunah ki targhib

yun farishta to na tha han magar insan tha main

un se ai dost mera yun koi rishta to na tha

kyun phir is tark-e-talluq se pasheman tha main

kis tasawwur ke tahat rabt ki manzil mein raha

kis wasile ke tassur ka nigahban tha main

phir pas-e-lafz yahi baat uThi thi kal shab

bikhre lafzon ke liye bais-e-haijaan tha main

is kahani mein koi rabt o tasalsul bhi nahin

kyun ki is zist ka sahil yahi unwan tha main